Базар-Коргон шаарында жаңы мектеп ишке берилди
Бүгүн Базар-Коргон шаарынын Совет айылында 150 орундуу, Баказ Абдрашев атындагы №60 орто мектебинин ачылыш аземи болуп өттү.
Иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев, Өзгөчө кырдаалдар министринин орун басары Урматбек Шамырканов, жергиликтүү бийлик өкүлдөрү жана шаар тургундары катышты.
Мектеп “Кыргызстанда жаратылыш кырсыктарынын тобокелдиктерине туруктуулукту жогорулатуу” (ERIK) долбоорунун алкагында, Дүйнөлүк банктын каржылоосу менен курулган. Долбоордун жалпы наркы 101 миллион сомду түзөт. Имараттын курулуш иштери 2024-жылдын июль айында башталган.
Ачылыш аземинде ыйгарым укуктуу өкүл Тилек Текебаев мугалимдерди, окуучуларды жана шаар тургундарын жаңы билим уясынын ишке берилиши менен куттуктады.
Ал өз сөзүндө жаңы мектептин аймак үчүн мааниси чоң экенин баса белгилеп, мектеп коомдун келечегин калыптандырган борбор экенин, заманбап шарттар балдардын сапаттуу билим алуусуна жана коопсуз чөйрөдө өсүп-өнүгүүсүнө жакшы мүмкүнчүлүк түзөөрүн кошумчалады.
