Облус башчысы Тилек Текебаев Голам-Хоссейн Мозафари менен жолугушту
Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Бишкек шаарында Иран Ислам Республикасынын Хорасан-Резави провинциясынын губернатору Голам-Хоссейн Мозафари менен жолугушту.
Жолугушуунун максаты эки аймактын кызматташуусун чыңдоо жана инвестициялык мүмкүнчүлүктөрдү талкуулоо болуп саналат.
Облус башчысы Жалал-Абад облусунун инвестициялык потенциалы, экономикалык мүмкүнчүлүктөрү жана негизги багыттары тууралуу маалымат берди. Аймак айыл чарба, энергетика, жеңил өнөр жай жана туризм тармактарында чоң мүмкүнчүлүктөргө ээ экенин белгиледи.
Өзгөчө көңүл облустагы пахта жана арпа өндүрүшүнө бурулду. Жолугушууда экспорттук мүмкүнчүлүктөрдү кеңейтүү, жергиликтүү фермерлер менен кызматташуу жана өндүрүштү модернизациялоо маселелери талкууланды. Өкүл ошондой эле, Иран өлкөсү менен нефть продуктуларына байланыштуу кызматташтыкка кызыктар экени белгиленди.
Эки тарап биргелешкен долбоорлорду ишке ашыруу, ишканаларды модернизациялоо жана экономикалык байланыштарды чыңдоо боюнча пикир алмашты.