Тилек Текебаев Кара-Көл шаарында 32 батирлүү көп кабаттуу турак үйдү пайдаланууга берүү аземине катышты
Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Кара-Көл шаарынын М. Сабиров көчөсүндө жайгашкан 32 батирлүү көп кабаттуу турак үйдүн ачылыш аземине катышты. Иш-чарага Кара-Көл шаарынын мэри Нуртилек Оорозбаев, жергиликтүү бийлик өкүлдөрү жана шаар тургундары катышты.
Турак үйдүн курулушу алгач 1985-жылы башталып, бирок каржылоо жана долбоордук иштердин үзгүлтүккө учураганынан улам, көп жылдар бою толук бүткөрүлбөй келген. 2024-жылдын август айында имаратта өрт кырсыгы катталып, 16 үй-бүлө турак жайсыз калган.
Бул көйгөйдү чечүү максатында жергиликтүү бюджеттен 50 миллион сомдон ашуун каражат бөлүнүп, имарат толугу менен реконструкцияланды.
Батирлер №85 үйдүн жашоочуларына, ошондой эле турак жайга муктаж жана мүмкүнчүлүгү чектелген 32 жаранга берилди.
Ачылыш аземинде облус башчысы Тилек Текебаев конуш ээлерин куттуктап, бул турак үйдүн бүткөрүлүшү мамлекеттин жана жергиликтүү бийликтин жарандардын жашоо шартын жакшыртууга багытталган маанилүү кадамдарынын бири экенин белгиледи.
